Iturria: Jabier Oses Azurmendi | Hizkuntza normalizazioko teknikaria | Kultura eta Hizkuntza Politika Saila
Euskara hobetzen
*MERKATAL, *MERKATAL ZENTROA
*merkatal, *merkatal zentroa
Desegokia da *merkatal hitza erdarazko comercial, mercantil (es) eta commercial (fr) adjektibo erreferentzialek adierazten dutena adierazteko. Aukera egokiak bi dira: merkataritza izena, elkarketan, eta komertzial adjektiboa.
Merkataritza- aukera finkatua da honelakoetan: merkataritza-zentro, merkataritza-gune (→ -gune/-une), merkataritza-ganbera, merkataritza-zuzenbide… Baztertzekoak, beraz, *merkatal zentro, *merkatalgune, *merkatal ganbera, *merkatal zuzenbide…
Komertzial adjektiboa ere egokia da behar denerako. Euskaltzaindiaren Hiztegian, adibide hauetan ageri da: irizpide komertzial, iragarki komertzial, film komertzial… Horietako batzuetan merkataritza- ere aukeran egon liteke (merkataritza-irizpide…), baina denetan ez (film komertzial bat, adibidez, ez da merkataritza-filma).
Merkatalgo izena (‘merkataritza’) jasoa dago Euskaltzaindiaren Hiztegian, baina bigarren mailakoa da merkataritza hitzaren aldean. [25. araua; EH] (→ adjektibo erreferentziala; → -al hitz-bukaerakoa)
