Iturria: Jabier Oses Azurmendi | Hizkuntza normalizazioko teknikaria | Kultura eta Hizkuntza Politika Saila
Euskara hobetzen
Plural hurbila lantzeko aukera aparta eskaintzen duen pankarta
“DeabruOK mugitzen dugu mundua” dio hasierako pankartak.
I/ Euskaraz (zenbat eta mendebalderago, sarriago –dirudienez–), nolabait esanda hurbiltasuna adierazteko erabiltzen da plural hurbila (–OK):
- Lehen pertsona (ni / gu) tarteko denean:
“DeabruOK mugitzen dugu mundua” dio hasierako pankartak.
- Bigarren pertsona (hi / zu / zuek) tarteko denean:
«Ekitaldian parte hartu duzuenON lana eta presentzia izan dadila beste askorentzat eredu eta gonbita».
- Baina, bi kasu horietatik aparte, baita erreferentea hurbila denean ere, denboran zein espazioan:
EAEn atzerritar gehiegi dagoela pentsatzen dutenen kopurua bikoiztu egin da azken lau urteOTAN
EAEko hiru herrialdeOTATIK Europara lan bila joan diren gazteen kopuruak ehuneko 65 egin du gora aurten.
- Edo erreferentea testuan bertan hurbil dagoenean (“aipatu ditugun horiek” edo “aipatuko ditugun honako hauek” esanez bezala):
Edozein zela ere Unibertsitate Legearen testua, ezezko botoa emango zutela agertu zuten hasieratik bi alderdiOK [Lehenago aipatu dira alderdiak; anafora da]
Literaturan topatu dut nik freskura; irakurtzea deliberatu nuen honako liburuOTAN: Alejandro Zambraren Bonsai narrazioan, Patxi Salaberriren No (Poema akrilikoak) izenekoan, Leire Bilbaoren Ezkatak poemarioan eta Peru Magdalenaren Lile harrigarrian. [Geroago aipatzen dira liburuak; katafora da]
2/ Bizkaieraren eremuko zenbait hizkeratan, singularrean ere erabiltzen dute artikulu hurbila, NON kasuan: aspaldion, aurton, berton…
