Hainbat lekutan aurkeztu dugu Mintzanet jada: herrietan, adinekoen egoitzetan, kultur erakundeetan, instituzioetan, elkarteetan… Eta horren adibide da Mintzanetek une honetan duen erabiltzaile kopurua, egunetik egunera hazten doana.
Adinekoen egoitzetan atea jotzen hasi ginenetik, ordea, lagun asko topatu ditugu euskaraz solastu nahi dutenei laguntzeko irrikaz. Donostiako Zorroaga egoitzan ditugu horietariko batzuk, tartean gure proiektuan buru belarri dabilen pertsonarik helduena: Pilar Iragorri, 89 udaberriren bueltan, 90 urte betetzera doan emakumea.
IRUDIAN: Pilar Iragorri bidelaguna, 89 urteko emakumea.
Hala eta guztiz ere, Mintzanetek 17 urtetik 89 urte bitarteko jendea elkartzen du. Askotan, topatuko ez ginatekeen lagun artean, harreman oso bereziak sortuz. Horren erakusle Mintzanet bere ahotan atalean ditugunak, parte hartzaileen esperientzia ezagutzera emateko sortuak.
Mila esker Mintzaneteko bidelagun eta bidelari guztiei, eta jarraitu euskararekin lanean, online, edonon, noiznahi eta doan!
