Javier Royo Erandiokoa da, baina Getxon bizi da. Berak 65 urte ditu eta erretiratuta dago. Internet bidez izan zuen Mintzaneten berri, eta aukera paregabea iruditu zitzaion: “Zaila da euskaraz hitz egiten duen jendea topatzea inguru honetan”.
Inoiz ez zeukan denborarik, baina azkenean, euskaraz hitz egiten ikasi du edo horretan ari da, behintzat. “Nire gurasoak euskaldunak ziren, eta momentu honetan, nire neuronentzat ona da euskara ikastea”, azaldu digu. Bere bidelaguna Eduardo Arrayet da, Alegikoa eta Javierrek hitz onak soilik ditu berarentzat: “Adiskidetasuna sortu da gure artean. Laster berarekin elkartzea espero dut, pertsonan, eskerrak eman ahal izateko”. Berarekin bakarka aritzeko aukera izatea Javierrek “luxu” bat dela esan digu, inguruan ez baitauka horretarako aukerarik.
