Iturria: Jabier Oses Azurmendi | Hizkuntza normalizazioko teknikaria | Kultura eta Hizkuntza Politika Saila
Euskera hobetzen
“Aditza, hizkeran, oso samar eta erraz erabiltzeko gai diren hiztunak ez dira %10.”
III) SUBJUNTIBOA
– «Kontsulta bat eskatuko dut, neurologo batek ikus zaitzan».
– «Zer egin dizuet nik, esker txar hori eman diezadazuen?». Zaitzan, diezaguzuen, gaitzazuen, diezazudan ….
Hiztunek ez dakite adizki horiek esaten. Eta iraganean, are gutxiago: Genitzan, zintzagun, gintzazuen, geniezazun, ziezazkidan …. Zer egin?
- T(Z)EKO
– «Kontsulta bat eskatuko dut, neurologo batek zu ikusteko».
– «Zer egin dizuet nik, zuek guri esker txar hori emateko?».
Eta horrelaxe subjuntibo guztiak, oraineko nahiz iraganeko. Beste pare bat adibide:
– Nik zer egin dizut-nizun zuri, zuk niri zorrak ordaindu nahi ez izateko?
– Ez dakit-nekien zer egin behar dudan-nuen zu egoeraz jabetzeko.
- T(Z)EA
– Ez da nahikoa zuek niri dena barkatzea (barka diezadazuen) ni zuekin denean konforme egoteko (egon nadin).
– Komeni da gai hau denon artean aztertzea (azter dezagun), txoriburu baten asmakizuntzat ez gelditzeko (gelditu ez dadin).
– Zu ere proiektu honen parte izatea (izan zaitezen) nahi genuke.
– Zu ere proiektu honen parte izatea (izan zintezen) nahi genuen.
Bi baliabide horiekin, T(Z)EKO – T(Z)EA, subjuntibo guztien arazoa argi eta zuzen konpontzen da. Testuinguruen arabera, beste saihesbide batzuk ere egon litezke, baina bi badiren tokian, ez gara saiatuko gehiagoren bila.
