Iturria: Jabier Oses Azurmendi | Hizkuntza normalizazioko teknikaria | Kultura eta Hizkuntza Politika Saila
Euskara hobetzen
kosta(tu)
Zaio (eta da) aditza da.
*Asko kostatu du (> Asko kostatu zaio). Asko kostatu da.
*Zenbat kostatzen du proiektu horrek? (> Zenbat kostatzen da proiektu hori?)
*Oso gutxi kosta(tu)ko digu (> Oso gutxi kosta(tu)ko zaigu). (→ balio izan)
Bestalde, aditz nagusiaren formaren bi moldeak daude ondo: kosta zaio / kostatu zaio; kostako zaio / kostatuko zaio.
Adibideak:
Ikaragarri kosta zaio etxe berria.
Ederki kostatu zaio gaur lokartzea!
Ez zaio inori askorik kostako hura nondik nora dabilen ikustea.
Kostatuko zaizue merkeago aurkitzea, bai horixe! [EH]
Aditz-komunztadura objektuarekin (ZER) egiten du, ez kopuruarekin (ZENBAT):
1.500 milioi kosta(tu) zaigu errepide berria.
Berrehun pezeta kostatu den liburua.
Asko kostatu zaizkigu lortu ditugun libertate mugatuak.
balio izan
1.- ‘Kostuaz’ ari garela:
Liburu horrek 23 euro balio du/ditu. Aditz-komunztadura, singularrean zein pluralean. Galdera bi modutan egiten da:
Zenbat balio du? eta Zer balio du?
2.- ‘Baliozko izateaz’ ari garela:
Balio du lanerako.
3.- ‘Merezi izateaz’ ari garela (gogora dezagun “Ez du merezi hori konpontzen hastea (*hasteak)” dela esaldi egokia merezi izan aditzari dagokionez (→ merezi izan)), bi erabilerak onartzen ditu balio izanek:
Ez du balio hori konpontzen hastea eta
Ez du balio hori konpontzen hasteak. [EH]
Balio izanez da nahastu behar kosta(tu) aditzarekin. Bakoitzak bere esanahia izateaz aparte, aditz-erregimen diferentekoak dira:
balio izan DU aditza da;
kostatu, ZAIO aditza.
Beraz, Zenbat balio dezakeen (*kosta dezakeen) jakin nahi dut.
1.500 milioi kosta(tu) zaigu (*balio dizkigu). (→ kosta(tu))
