Ainara Maia (Irun, 1976), Peio Duzan (Frantziako Tolosa-Estrasburgo, 1985) eta Joxe Mari Allur (Lazkao, 1944) izan ziren Mintzanet Eguneko protagonistak. Donostiako Tabakalerako Kutxa Plazan eman genituen V. Mintzanet Sariak. Ekitaldi xumea eta hunkigarria izan zen.
Azaroaren 23a da eta hasi da Euskaraldia. Mintzaneteko lantaldeko kideok (Ritxi Lizartza -proiektu burua-, Amaia Etxepeteleku -diseinatzailea-, Mikel Galdeano -informatikaria-, eta Ainara Loiarte eta Cristina Tapia -koordinatzaileak-) parte hartuko dugu ariketa sozial honetan ahobizi eta belarriprest gisa. Eta abenduaren 4an tinko jarraituko dugu!
Azaroaren 5ean Bilboko Txurdinaga ikastetxera joan ginen. Bertako ikasleek Mintzanet zer den eta nola funtzionatzen duen gertutik ezagutzeko aukera izan zuten. Zuzeneko bi konexio egin genituen bi erabiltzailerekin: Dylan Inglis eta Amaia Etxepeteleku. Eskerrik asko!
Maialen Goñi (Donostia, 1989) bidelguna eta Igone León (Bilbo, 1993) bidelaria elkarrekin egon dira udan Donostian. Ia duela bi urte hasi ziren Mintzaneten, eta geroztik Maialenek Beratik (Nafarroa) eta Igonek Varsoviatik (Polonia) astero euskaraz hitz egiten dute. Eskerrik asko, bikote!
Urriaren 9an Donostiako Bidebieta auzoan dagoen KutxaZabal zentroan egon ginen. Eta bertan dauden ikasleei Mintzanet proiektua aurkeztu genien.
Mila Altuna (bidelaguna), Gorka Fernández (bidelaria) eta bere familia elkartu egin dira Azpeitiko San Martin adinekoen egoitzan.
Amaia Garate (Azpeitia, 1992) bidelagunak eta Alma Hidalgo (Mexiko, 1971 -Iruñean bizi da-) bidelariak elkar ezagutu dute. Astero Internet bidez aritzen dira euskaraz , baina oraingo honetan aurrez aurre hitz egiteko aukera izan dute.
Iñaki Urbistondo azpeitiarrak 60 urte ditu eta altzarigintzan egin du lan duela gutxi erretiratu arte. 2016an Necochean (Argentina) egon zen bertako Euskal Aste Nazionalean, eta bertako mintzodromoan izan zuen lehendabizikoz Mintzaneten berri. Izan ere, hangoek eta Euskal Herrikoek zuzeneko konexioa egin zuten Mintzanetek antolatutako ekimenari esker.
Uztailaren 14an hasi zen Argentinako Villa Marían (Córdoba) ‘Euskara Munduan’eko neguko barnetegia. Astebete iraungo du eta bertan, euskara ikasleak eta irakasleak elkartuko dira. Horien artean, Mintzaneten parte hartzen dutenak daude: María Begoña Tisera, Valeria García Oyarzabal, Christian Etxeberria, Flor Deniz, Martín Zabalza, Mariana Grande, Andrea Bella, Alfredo Laborde eta Inés Olazabal, besteak beste.
Gotzon Ugarte (Lekeitio, 1973) artista plastikoa Mungian bizi da. Amak Mintzaneti buruz hitz egin zion aspaldi. Gero, telebistan ikusi zuen proiektua eta izena ematea erabaki zuen.
